Resultater vum Waasserdësch

Réponse QP

7. Mai 2024

Äntwert op d’parlamentaresch Fro vum Joëlle Welfring iwwert d’Resultater vum Waasserdësch un den Här Minister fir Ëmwelt, Klima a Biodiversitéit.

Fir d’Diversifikatioun vun der Landwirtschaft virunzedreiwen an de Geméis- an Uebstbau ze favoriséieren, ass et onëmgänglech fir zesumme mat de landwirtschaftleche Betriber Léisungen auszeschaffen fir innovativ an effizient Reewaasser-Notzungssystemer en place ze setzen.

De 26. Januar 2021 hunn déi deemoleg Ëmweltministerin an den deemolege Landwirtschaftsminister sech mat de landwirtschaftlechen Acteuren um Waasserdësch getraff, fir zesumme Mesuren am Waasserberäich ze diskutéieren, déi de Produzent:innen entgéint kommen an zugläich eis national Waasserressourcë schützen.

Wärend dëser Reunioun gouf decidéiert eng Etüd ze lancéiere fir Piste fir d’nohalteg Notzung vu Waasser an der Landwirtschaft, d’Innovatiounsméiglechkeeten an dësem Beräich, an d’Implikatioune vun der Notzung vun dësem Waasser fir aner Beräicher (wéi de Naturschutz oder d’Autorisatiounsregimmer) wëssenschaftlech ze beliichten .

Och gouf decidéiert fir Pilotprojeten ze lancéieren, dëst mam Zil fir, op Basis vu wëssenschaftlechen Donnéeën, Léisunge kënnen auszeschaffen, déi vun aneren Acteuren an der Landwirtschaft an am Gaardebau kéinten iwwerholl ginn (z.B. eng effizient Notzung a Reutilisatioun vu Waasser, d’Opfänken a Stockage vu Waasser, a landwirtschaftlech Praktiken déi am Aklang mam Waasserschutz sinn).

An dësem Kontext erlaben ech mer et follgend Froen un den Här Minister ze stellen :

• Wat ass den aktuelle Stand vun der Implementatioun, respektiv wat sinn d’Resultater vun den Initiativen (Pilotprojeten, wëssenschaftlech Etüd) déi um Waasserdësch vun 2021 lancéiert goufen ? Wat sinn déi verschidden Etappen, déi bei dëse Pilotprojete respektiv den Etüden nach bevirstinn ier definitiv Conclusioune kënne gezu ginn?
• Wéi eng Acteure si fir d’Ëmsetzunng vun dësen Initiativen zoustänneg? Wéi vill gouf bis ewell an d’ Virbereedung an an d’Implementatioun vun den Initiative vum Waasserdësch investéiert an iwwert wéi eng Budgetsposte gi se finanzéiert?
• Wéi vill Autorisatiounsdemandë krut den Ëmweltministère an de leschten zwee Joer vu landwirtschaftleche Betriber fir d’Opstelle vu Waasserreservoiren eran, déi fir d’Irrigatioun solle genotzt ginn? Wéi vill vun dësen Demandë kruten eng Geneemegung erdeelt? Wéi vill Demande goufe refuséiert a wat waren d’Grënn fir de Refus vun dësen Autorisatiounen?

Réponse